Feb 4, 2015

අපයෝජනයට, හිංසනයට හා දූෂණයට එරෙහිව නැගී සිටිමු






වර්තමානයේදී ලෝකයේ සෑම මිනිත්තු දහයකට(10) ට වරක්ම කිසිදු වයස් බේදයක් හෝ ලිංග බේදයක් නොමැතිව අයකු අපයෝජනයට , හිංසනයට හෝ දූෂණයට ලක් වේ. දහමෙන් ඈත් වූ ජීවිත නිසා බොහෝ දෙනෙකු අනෙකෙකුගේ ජීවිතය හෝගෞරවය පිළිබඳව අබ මල් රේණුවක තරම් වත් තැකීමක් නැති බව පෙනී යයි. විශේෂයෙන් ම මෙම අවාසනාවන්ත ඉරණමට මුහුණ පෑමට සිදුවන්නේ කාන්තාවන්ට සහ කුඩා ළමුන්ට වීම මෙහි ඇති ශෝකාන්තයයි. ඇතැම් රට වල පිරිමින් පවා සමූහ දූෂණයට ලක්වන අවස්ථා අපට අසන්නට ලැබේ.


අප මෙම ලිපියෙන් වැඩි අවධානයක් යොමු කරන්නේ කාන්තාවන් වෙතයි. අප සමාජයේ කාන්තාවන් බොහෝ විට මෙවන් සිදුවීම් නිසා අසරණ තත්වයට පත්වෙති. අප විශේෂයෙන්ම අපගේ අවධානය යොමු කළ යුත්තේ මෙහි ඇති හේතුව වෙතයි. ඇතැම් විට පිරිමින් මෙන්ම ගැහැණුන් ද පවසන දෙයක් වනුයේ ඇතැම් කාන්තාවකට යම් අතවරයක් හෝ අපයෝජනයක් විණි නම් ඒ ඇයගේ ඇඳුමෙහි ඇති වරදක් නිසා හෝ ඇය හැඩකාර පියකරු ළඳක් වීමයි. අපි මුලින්ම කාන්තාවන්ට මගතොටේදී සිදුවන අපයෝජන හිංසන සහ දූෂණය පිළිබඳව කතා කරමු.




ඇත්තෙන්ම නාරි ලාලිත්‍යය යනු ඉතිහාසයේ පටන් ම පිරිමින්ගේ මන පිනවූ මහා සාධකයක් විය. අතීතයේ රජවරු පවා අන්තඃපුර තබාගෙන සිටියේ තමාගේ මනදොළ මෙන්ම ගතදෙළද පිනවා ගැනීමටය. නමුත් වර්තමානයේදී පෙරදිග රටවල් වල කාන්තාවන් අපරදිග චින්තන රටා සමග හුරුවී , එවැනි ඇඳුම් භාවිතයට හුරු වී සිටිති. එය වරදක් නොවේ.විශේෂයෙන්ම ගතහොත් 2012 ඉන්දියාවේ දිල්ලි අගනුවර වෛද්‍ය ශිෂ්‍යාවක්(මෙම ඡායාරුවෙහි සිටන) හය දෙනකු විසින් සාහසික ලෙස දූෂණය කර මරා දැමුයේ , ඇය ඉන්දීය පන්ජාබි ක්‍රමයට සැරසී සිටි නිසාද? ඇය රූප ස්වභාවයෙන් පියකරු දැරිවියක වූ නිසාද? මසැසින් නොව මනැසින් සිතන්න කාන්තාවක් තම අඟපසඟ පෙනෙන අයුරින් (කවරයේ රූපය මෙන්) හෝ තම ශරීරයේ හැඩය කැපී පෙනෙන අයුරින් හැඳ පැළඳීම ඇයට ලිංගික අතවරයක් හෝ අපයෝජනයක් කිරීමට අනුබල දීමක් නොවේ. පිරිමින්ගේ හෝමෝන ක්‍රියාකාරිත්වය අනුව ඇය දෙස බැලීමට සිතීම හා ඇයට ආකර්ශනය වීම ස්වභාවික වේ. ඇතැම් විට එය ඇයගේ අරමුණක් වීමටද පුළුවන. මන්ද බොහෝ පිරිමින් තමා දෙස බලනවාට ම එවැනි ඇඳුම් අඳින්නියෝද නොසිටින්නෝද නොවේ! කෙසේ වෙතත් මග තොටේ දී කාන්තාවන් හට පිරිමින්ගෙන් එල්ල වන හිංසනයද සුළුපටු නොවන බවද වටහා ගත යුතුය. නමුත් මෙය මෙසේම යැයි කියා තියුණු රේඛාවකින් වෙන් කළ හැකි මාතෘකාවක්ද නොවේ. ඇතැම් පිරිමින් සිය වුවමනාවෙන්ම කාන්තාවන්ගේ පියැයුරු වල තට්ටම් වල සිය ශරීරය ස්පර්ශ වන පරිදි හැසිරෙයි. ඇතැම් විට සෙනග පිරුණ බස් රථ වල සිටගෙන යාමේදී , මෙසේ ශරීර ගැටීම් වැලැක්විමට නොහැකි වනු ඇත. මෙවැනි බොහෝ අවස්ථා වලින් , පළ නෙලා ගන්නා පිරිස් , දෙපාර්ශවයෙන්ම නැත්තේද නොවේ. මෙහිදි කාන්තාවක අපයෝජනයට හෝ දූෂණයට හෝ හිංසනයට ලක්වීමක් අර්ථකතනය කරන්නේ කෙසේද? කාන්තාවකගේ ශරීරයෙහි නොගැටී සිටීමට හැකි වාතාවරණයක , සිතාමතා ඇයගේ ශරීරයෙහි ස්පර්ශ වීමට උත්සහ කිරීම . ඇයගේ පසුපසින් ඇය යන සෑම තැනකම පිටුපසින් යෑම/යෑමට උත්සහ කිරීම. ඇයට අයුතු ලිංගික යෝජනා ගෙන ඒම ආදිය උදාහරණ ලෙස දැක්විය හැකිය. මතක තබාගන්න මෙලෙස කාන්තාවන් වෙත අයුතු අයුරින ළං වීමට උත්සහ කරන අය ළඟ සෑම විටම දීමට පිළිතුරක් ළඟ ඇති බව.


එසේ නම් මෙවන් අවස්ථාවලට කාන්තාවන්/පුරුෂයන් මුහුණ දීමට සිදුවන්නේ ඇයි? සහ/හෝ එසේ සිදුවූ පසු ඔවුනට මානසිකව සහ කායිකව සිදුවන්නේ කුමක්දැයි මීළඟට සාකච්ඡා කරමු. මෙවැනි තත්ව වලට ඉලක්ක වන/මුහුණ දෙන බොහෝ කාන්තාවන්/පුරුෂයන් අඩු පෞරුෂයක් හිමි,තමා පිළිබඳ හීනමානයකින් හෙබි, ආත්ම විශ්වාසය අඩු අයයි. හිංසකයින් හට, මෙවන් අය ඔවුනගේ ශරීර භාෂාවෙන්(body language) බොහෝ පහසුවෙන් හඳුනාගත හැකිය. එවන් හැසිරීම් රටා කිහිපයක් පහත සඳහන් කරමි.
කිසිවකුගේ දෑස් දිහා කෙළින් නොබලයි
තම ශරීරාංග හෝ තමාගේ ශරීරය පිළිබඳව ලජ්ජා වන කොටස් වසා ගැනීමට(පොතකින් හෝ බෑගයකින්) උත්සහ කරයි.
හිස පහත් කරගෙන බියගුලු ස්වභාවයක් පෙන්වයි.
නිතරම කලබල ස්වභාවයකින් සිටියි.


හිංසකයන් මෙසේ යමෙකු අරමුණු කරගෙන පැමිණෙන විට, ඔවුනගේ දෑස් දෙස කෙළින්ම බැලුවහොත් ඔවුහු එම පුද්ගලයා මගහැර වෙනත් ඉලක්කයක් වෙත යනු ඇත. එයට හේතුවක් නම් , තම ඉලක්කය තමාව හොඳින් දැකබලා ගැනීම නීතිය ඉදිරියේදී තමාට අවාසියක් වන නිසාත් , පිරිසකින් තමාව වෙන්කර හඳුනාගත හැකි නිසාත්ය. දෙවැනි දෙය නම් තමාට යම් හිංසනයක් සිදුවන්නේ නම් හෝ සිදුවීමට යන්නේ නම් මදක් උස් හඬින් එම පුද්ගලයා අමතන්න. තමාට එරෙහිව සිදුවන අකටයුත්තකට නිහඬව සිටීම යනු එයට තවදුරටත් අනුබල දීමකි. මෙසේ ඔබගේ ප්‍රතිරෝධය දැක්වීමද ඔබට එන ආක්‍රමණිකයා වෙනත් ඉලක්කයක් බලා යාමට පොළඹවයි. මෙය තමාට සිදුවන හිංසනයෙන් ගැලවීමට ඇති මූලිකම ක්‍රමයයි. දෙවැන්න නම් පළමුවැන්නට ප්‍රතිචාරයක් නොදක්වන පුද්ගලයන් හට කායිකව ප්‍රතිරෝධය දැක්වීමයි. මේ සඳහා ඔබට යම් ආත්මාරක්ෂක පුහුණුවක් තිබිය යුතුය. (වැදගත් ආත්මාරක්ෂක පුහුණුව සහ සටන්කලා පුහුණුව යනු දෙකකි. ඇත්තෙන්ම ආත්මාරක්ෂක පුහුණුව, සටන්කලා පුහුණුවෙහි උප කුලකයක් වුවද මෙය සටන්කලා පුහුණුව තරම් නිරතුරුව පුහුණු විය යුතු නැත.)


කාන්තාවක හෝ පුරුෂයකු අතවරයකට/අපයෝජනයට ලක්වූ විට, මානසිකව බොහෝ ඇද වැටේ. ඔවුන් නිතරම තම සිතින් සිදු වූ සිද්ධීය මේ අයුරින් වෙනස් කළ හැකිව තිබුනා යැයි සිය දහස් වාරයක් සිතයි. අවසානයේදි එය සිය නොහැකියාව හෝ තමාගේ දෛවය යැයි සිතා මානසිකව කඩා වැටේ. එවිට ස්වභාවිකවම ඉහත සඳහන් කළ මූලික ශරීර භාෂාව ඔබගෙන් නිරූපනය වන අතර එය තව තවත් ඔබ හිංසනයට පත් කරවීමට අතවැනීමක් වනු ඇත. එසේ නම් මෙයට පිළියම කුමක්ද? මූලිකවම ආත්මාරක්ෂක පුහුණුවක් ලබාගන්න. දෙවනුව තම මානසික මට්ටම ඉහළ නංවා ගන්න. මෙයට අවශ්‍ය නම් මනෝ වෛද්‍යවරයෙකුගෙන් උපදෙස් ලබාගන්න. තෙවනුව තම ආත්මවිශ්වාසය වැඩිකරගන්න. සිදුවූ දෙය සිදුවී ඇතත්, එය අතීතය බාර නොදී එහිම වසමින් ඒ තුළ මියැදීම නොකරන්න.


මෙහිදී පසක් කළ යුතු තවත් වැදගත් කාරණාවක් ඇත. එය නම් අප වසනුයේ සමාජයක් තුළය. එමෙන්ම අප පොදු ස්ථාන වල ගැවසෙන්නො වෙමු. ඉදින් කාන්තාවක් වශයෙන් පොදු ස්ථාන වල ගමන් බිමන් යාමේදී , බොහෝ විට තරුණයන් විසින් උරුවම් බෑම (whistling), හෝ යම් යම් දේ කීම ස්වභාවික දෙයකි. එය ඇත්තෙන්ම එතරම් යහපත් නොවූවත් , එය ඔබට කිසිවිටක ශාරීරිකව හානියක් නොකරයි. ඉතිරි සියල්ලම ඇත්තේ ඔබගේ මානසිකවයි. ඔබ එවැනි දෑ නිසා සැලිය යුතු නැත්තේමය. මන්ද ඔවුන් ඔවුන් බැවිනුත්, ඔබ ඔබ බැවිනුත්ය. බල්ලකු අපව සපා කෑවද අප බල්ලාව සපා කන්නේ නැත. (මෙය හුදෙක්ම වාචික හිංසනය සඳහා පමණි)


වීදියේදී සිදුවන හිංසනයට එරෙහිව හඩක් නගන සංවිධානයක් ලෙස තරුණ කොටස් එකැමුතු වූ Street Harassment Hurts සංවිධානය , එවැනි හිංසනයට අපයෝජනයට ලක්වූ අයගේ හඞ සමාජගත කරන ක්‍රියාකාරී කොටසකි. එසේම ලංකාව තුළ අලුතින්ම බිහිවූ ජාත්‍යන්තර සංවිධානයක ශාඛාවක් වන Damini Project- Sri Lanka විසින් පාසල් හා පුණ්‍ය ආයතන සඳහා නොමිලයේ ද, ආයතන දෙපාර්තමේන්තු හා තරුණ සංවිධාන සඳහා සහන මිලටද දේශන හා වැඩමුළු පැවැත්වේ. ඔබ හිංසනයට හෝ අපහසුතාවයට පත්වූ අවස්ථා ඇත්නම් Street Harassment Hurts වෙත ඔබගේ සිද්ධිය දන්වා එවන්න. එවිට අනෙකුත් සියලුම හිංසනයට ලක්වන්නා වූ හෝ ලක්වූ පාර්ශව නගාසිටුවීම සඳහා දිරි දීමක් වනු ඇති අතර , ඔවුන් කිසිවිටකත් හුදෙකලා නොවී ඇති බව පසක් වනු ඇත.






෴ හිංසනයෙන් තොර හෙටක් උදෙසා අදම එක්වන්න. ඔබට සුභ දවසක්!